اعلن اليوم اللاعب الدولي محمود الغربي عن اعتزاله اللعب في تدوينة نشرها على صفحته على الفايسبوك كتب فيها ما يلي: بعد مسيرة لاعب كرة يد دولي دامت حوالي 20 سنه بين الترجي الرياضي التونسي، الفريق الوطني التونسي، فريق HBC Nantes، فريق الوكِرة القطري  ... ولي ،الحمد لله، حظيت فيها بألقاب على مستوى محلي و دولي و ما نجم نكون كان فخور باللي حققتو  ... جاء الوقت المناسب للأعتزال والمرور لمرحلة جديده من حياتي.. 
في ختام المسيرة متاعي ما نجم كان انو أنحني تواضعا قدام كل شخص وقف معايا و ساندني و انشاء الله كنت في مستوى ثقتهم و محبتهم .
نحب نسجل فخري و إعتزازي اني أحد ايناء الترجي الرياضي التونسي اللي إحتضن الموهبة متاعي و اللي مع الفريق الوطني التونسي كانو البوابه نحو الملاعب العالميه.... و نخص بالشكر  السيد سليم شيبوب، السيد عزيز زهير و السيد حمدي المؤدب على دعمهم المتواصل ليا داخل و خارج الملاعب .و السادة محمد الصباغ و قيس عطيه على تأطيرهم. 
كل الاعتراف بالفضل والعرفان لكل من لعبت تحت قيادتهم من مدربين محليين او عالميين، ،إلى الطاقم الرياضي و الفني و الطبي، إلى القائمين على الصيانه و التجهيزات  في الملاعب،... شكرا لكل اللي رافقتهم في الملاعب ،سوى لعبت معاهم أو ضدهم،، من نجوم محليين ودوليين ، و زاده  لزملائي في رحلتي الدولية مع المنتخب الوطني. وكل الامتنان لكل صحافي و إعلامي قام بنقد بناء و اهتم بالمسيرة المحلية و الدولية متاعي .
مع إعلاني اليوم اعتزالي "كلاعب كرة يد" بشكل نهائي، نشكر العائلة متاعي الي كانو ديما مصدر دعم و مساندة بلا حدود، و نكرر شكري وتقديري ومحبتي لجمهور الترجي الرياضي التونسي الي عشت معاه أجواء ما تتنساش... ولكل الجماهير المخلصة لكرة اليد اللي حبتني ،بعيدا على كل الانتماءات، كلاعب في الفريق الوطني و كلاعب دولي.
ان شاء الله نكون خليت بصمة إجابية ومشرفة في مسيرتي الكروية وان شاء الله نجم نكون قدوة باهية للجيل الصاعد.
شكرا لكرة اليد لما قدمته لي ، شكرا على محبتكم    تحيا تونس.